O vindeiro martes, 8 de abril terá lugar ás 20 horas na Real Academia Galega de Belas Artes o concerto “Paisaxes de lenda: A coruña e a Cultura Galega”, composto polas obras “Zoar do vento”; “Sonata española” e “Camiño dos faros”. É o terceiro dun ciclo de recitais titulado “Estreas na Academia” na que se interpretan obras de Fernando Vázquez Arias co propósito de dar a coñecer as obras deste compositor nos últimos anos.
 
O Zoar do Vento para quinteto de vento-madeira composto no ano 2017, está inspirado na dinámica do vento e a súa relación co clima. A obra divídese en tres movementos, que representan diferentes facetas deste fenómeno natural e será interpretado polo Quinteto de Vento G1, dirixido por Julio Cabo Messeguer  e integrado por María Piñeiro Ruibal (frauta); Pablo Díaz Coira (oboe); Pablo Ares Ferro (clarinete); Nerea Fernández Sampayo (trompa) e Mario Hermida Martínez (fagot).
 
O recital continuará coa “Sonata Española”, composta no ano 2024 para trompeta e piano, é unha obra que capta a esencia da música española, inspirándose nas súas melodías e ritmos característicos. A través da mestura de elementos tradicionais e contemporáneos, a sonata evoca a rica tradición musical de España e será interpretada por Gonzalo Sánchez García á trompeta e Ricardo Blanco ao piano.
 
Por último, a soprano Clara Jelihovschi Panas, o violoncellista Ramón Solsona Massana e o pianista Ricardo Blanco interpretarán “Camiño dos Faros”, ciclo de cinco cancións galegas composto no ano 2018 para soprano, violoncello e piano, inspirado na beleza e forza da Costa da Morte. As Cancións, con textos de Claudia Castro e Miguel Melero, exploran a conexión entre o mar, a terra e as emocións humanas. As pezas Amor e Mar, Azul, Todo Estivo, Camiño dos Faros e Corme combinan a riqueza coa intensidade da paisaxe atlántica, capturando o espírito e a esencia desta terra máxica.